حادي بادي كرنب زبادي 2010
28 نوفمبر 2010
حصري
دورت علي تصريف كلمه إنتخابات لقيت التالي
- انتخ يعني كرش ونام وكبر دماغك يا ريس
- بات يعني نام عندنا واللي تعرفوا أحسن من اللي متعرفوش
مش من الأشيك والأجمل والأنظف والأرق إن التلفزيون المصري يخصص فقره إنتخابيه علي مستوي الست قنوات المحليه واللي معاه فلوس أكتر وعايز فضائي يدفع ويطلع كل مرشح يدعو أهل دائرته لإنتخابه من خلال برنامجه دا لو له برنامح حتي الناس تشوفه وهو بيتكلم وفي التليفزيون ولو لمده ربع ساعه كل يوم يقول اللي نفسه فيه ويخنق أبو المشاهدين باللغه العربيه البايظه ويبقي يشتغل في الرشاوي في الشارع بس من غير لافتات قماش وورق في كل مكان علي الجوامع والمدارس والمحاكم والتاكسيات والميكروباصات وكأن يعني دي أخر إنتخابات هتحصل في مصر .. دا حتي النظافه من الإيمان يا نااااااااااااااس
خلوا عندكم صوت والكل يرقع بالصوت علي مصر
طبعا بما إننا كلنا عارفين إن وظيفه مجلس الشعب هي طبخ القوانين بأسرع ما يكون لخدمه الشعب فأظن إن مع وجود مقاعد أكثر للمرأه الطبخ هيبقي ألذ
ناس تطفح الكوته وناس تدخل المجلس بالكوته . فرق كبيررررر
وعلي رأي المثل
يا داخل المجلس بالكوته .. تخش المجلس وتفضل مصر مكبوته
مصر محتاجه حد ياخدها يحميها ويليفها كويس وبعدين يلبسها لبس جديد يمشي مع اللبس اللي كل الدول اللي حوالينا بتلبسه ومظبوط عليها .. بس الخوف الميه تقطع ومصر تفضل من غير هدوم وبردوا هنفضل نتفرج .. ونهتف تعيش مصر حره متحرره علي الآخر ..
كل المرشحين اللي نازلين يأنتخوا والله محتاجين ترشيح طويل المدي.
فيه مرشحه للحزب الوطني منزله لنفسها صورتين للدعايه الإنتخابه ، واحده بالحجاب والتانيه من غيره .. اللي يعرف السر يتصل علي 0900 ولو جاوب صح هخليه يستحمي عندنا .
حادي بادي كرنب زبادي
وإنته مغمض حط علامه صح قصادي
أنا أنسبلك م اللي قصادي
أنا أنفعلك وأنا أبقالك
وإبقي تعالي بس اما أنجح وأنا أصححلك وجهه نظرك
إن الصح بتاعتي فلوس
تاخد أكتر لما تبوس فرده رجلي يا إبن الصرمه
علشان راضي تعيش بلبوص
وانا هتفرج علي أمثالك لما الحاله معاك تلوص
وأفضل أعاير فيك وأذلك
لحد ما ضميرك يدلك
إن أنا مش غاوي إنتخابات
وإن أنا قلت الحاله أهي جات
وإن ضربت يبقي هتتظبط
وإن خابت يبقي خبرات
في الرشوه والإنتخابات
شعار مرشح نصاب
إنتخبوني إنتخبوني يا أهل الله والنبي ساندوني
أنا واقع في عرض أبوكم بأصواتكم والنبي ساعدوني
أنا عايز أبقي بحصانه أتصان وحياتي متصانه
وهقدم خدمات لولادكم بس فلوسكم مش متصانه
المفروض في أي إنتخابات نيابيه أو رئاسيه أو حتي ملوخيه إن الشعب ميكونش خايف ينزل ينتخب .. إنما عندنا في مصر الخوف هو السمه الأساسيه لأي إنتخابات والله بعيني شايف بعض أنصار مرشحين شايلين أسلحه رهيبه ( عصيان وسنج ورشاشات آلي ) لتخرينها قرب مقر لجان الإنتخاب .. كنت هبلغ جهاز حمايه المستهلك لأنهم واخدين كميه زياده عن المسموح بس قلت بلاش يلا من باب عدم اللعب في الإستقرار وزعزعه الأمن المهم يبقي اللي هينزل يكتب وصيته لأهله قبل ما ينزل يتنفخ .. قصدي ينتخب
لو سألت أي عضو مجلس شعب سابق محترم ومتدين وذو قيم وقومي وعربي ومصري وسياسي ومحنك وعارف المستخبي وإيده في المطبخ التشريعي وفي كل الحلل .. لو سألته يا حضره النايب هل في فتره حضرتك الجليله تم تمرير بعض القوانين الغير مرضيه للشعب هيقولك أه حصل طيب هل تم عمل إستجوابات للحكومه عن أدائها الغير مرضي للشعب .. هيقولك أه حصل
طيب هل قدمت خدمات واضحه لأهل دايرتك اللي زي ما كلنا عارفينها ( رصف شارع / كهرباء لبيت مخالف / تشغيل إبن في الكهرباء او البترول / حضور نهائي دوره كوره / حضور عزاء / حضور فرح حد مهم إلخ من التفاهات ) هيقولك أه بيحصل
طيب هل حصل تغيير يا حضره النايب في أي من سياسات الحكومه أو إرتفاع مستوي أي شئ في مصر خلال فتره سعادتك .. هيقولك أه من وجهه نظره .. والكل عارف إنه لاء من وجهه نظرنا
طيب بترشح نفسك تاني ليه . أو أساسا بتهين نفسك وبتدخل ليه اللعبه القذره دي في الجو الفاسد ده .. ساعتها هتلاقي الوطنيه والمهلبيه والملوخيه طلعت عليه واليفط اللي عليها شعارات ظهرت
ومصر والوطن والتغيير والدستور ولا أحد فوق القانون وشمعه في الإيد خيراً من إيد فاضيه وبعدين يقولك القياده الحكيمه للقائد والملهم والأب ...... إنتوا عارفينه طبعا .... الخلاصه إن مجلس الشعب وإنتخاباته ما هي إلا مسلسل سخيف وممل ومهين لا ينتج عنه إلا شويه أونطجيه وأحيانا بلطجيه بيضحكوا علينا بشويه مفاهيم عن حاجات إتغيرت من سنين كتير جدا في كثير من الدول .
أخيراً
خبر لوزير الصحه // وأنا عارف إنه أكيد متابع جيد لمدونتي ،
الأسانسير اللي موجود في المستشفي الجامعي بالمنصوره بايظ من 3 شهور وعلشان مريض يطلع العنايه المركزه لابد من شيله والطلوع بيه 3 أدوار علي السلم . دا لو معاه واسطه إنما لو مش معاه هيبلغوه إن مفيش مكان في العنايه فاضي .. حاجه تفتح النفس وتطول العمر ..
نشوفكم بكره بعد ما نشوف نتيجه الماتش بكره هيكون لصالح الحزب الوطني ولا الإخوان ولا مصر !!
0 التعليقات على حادي بادي كرنب زبادي 2010
إرسال تعليق