شـو يـعـنـي حـصـار ؟
29 أبريل 2010
ماذا يعني " الحصار" – شو يعني حصار؟
من عامين و بلدنا تحت الحصار
شو ؟ ما فهمتش
بسيطة ، رح اكولك باختصار
بلدنا سجن كبير، ملوش سكفيّة ، اله جدار
المساحة : 360 كم 2 – عدد السكان : مليون ونص ! مش كتارا
ما تسألنيش عن العملة ، عن العاصمة
رجاءً بدون اصرار
الله يسعدك ما تحرجنيش يا زلمة ازا علم البلد الأصلي طاااار
طيّب كُلّي ، تشيف الوضع ؟ تشيف الأحوال ؟
بطالة ما فش أشغال
وينهم اصحاب رؤوس الأموال ؟
الله بعلم بس اكيد بشتغلوا في الحلال
اضراب معلمين .. فش معاشات
تعليق طلاب .. فش محاضرات
كل واحد ساكن هون .. رح يضل محبوس هون ... هيك أمر شارون
المعابر مش رح نفتخ.... لا بكرا ولا بعده ولا بعد ألف يوم
المي مقطوعة ... الكهربا مقطوعة ... وخط التلفون مقطوع
الله يقطعها من عيشة ، بس الفواتير اللي عمرها ما بتنقطع ... يا الله يقطعها
أبواب السجن مسكرة .. المي اللي بتوصلنا معكرة
فش بضايع مستوردة تدخل .. وصناعة محلية يدوبك عنّا
المحلات بتفضى .. والمستودعات شو بتحمل ؟
ريح راسك واحفر نفق .. هرّب بضاعة .. احسن حل لالنا
بضاعة تهريب ..أسواق سود .. الطلب عالي .. استهلاك رهيب .. والعرض محدود
كل الأسعار قاعدة بتغلى .. جرّة الغاز قاعدة بتفضى .. والقهوة مش راظية تغلى
بلّشت تفهم شو يعني حصار ؟
منع تجول – ما في طلعة من الدار
احمد ربك لسا عندك دار
جارك بيته انقصف وطاار
والله مش هاين علي اسملّك بدنك
بس بدك تعرف .. ممكن يستشهد ابنك
بنقعد بالليل على ضو الشمعة
بدرّس ابني وبقلبي دمعة
خايف شي يوم يطلع عالمدرسة
يرجع شهيد ويموت حلم الهندسة
سميتلك بدنك غصبن عني .. بس هاد تعريف بسيط ( للحصار)
غلط غيري وسماها اتفاقيات سلام .. في الواقع هيّ معاهدات دمار!
شاطرين في الشعارات "بناء دولة فلسطين مستقلة وعاصمتها القدس"
آآه ه ه مزبوووووط يبقى موووووت يا حمااارر
لسا بتسألني "تشيف حالتش" ؟ شو بدك ياني اكولك ؟
متسخّم --- والوضع دايماً برجع لورا
بس " عايش – منيح – تشويس -- تمام"
خذ منّي وعد .. بحلفلك بوطني
رح اضلني فلسطيني و راسي مرفوووع
0 التعليقات على شـو يـعـنـي حـصـار ؟
إرسال تعليق