الشعب أسقط النظام
14 فبراير 2011
اوعي مره تصدقي إني خاين او عميل
اوعي مره تفكري اني انا ناكر جميل
بصي بعنيكي وشوفي احنا مين وهما مين
احنا من نيلك شربنا شربه الميه الهنيه
وهما من وراكي قتلوا اولاداك واحد وميه
احنا عايزينك صبيه تشرق الشمس في عنيكي
وهما عايزينك عجوزه تدبل الورده في إيديكي
احنا عايزينك بلدنا نبقا ليكي وانتي لينا
وهما عايزينك عشانهم ويفضل الهم مالينا
لاء يا بلدي مش هطاطي او اسلم وانهزم
احنا من دمانا نخلق بسمه لازم تترسم
فوق اراضي مصرنا ورمزنا وعزنا
ونخلق من ارواحنا ساتر نحمي بيه ارضنا
انتي يا بلدي نسيتي انك انتي أمنا ؟!!
مبروك لكل من قال الشعب يريد إسقاط النظام . وساعد في إسقاطه ولو بالدعاء
إفرحوا بالحريه وإستمتعوا بيها وحافظوا عليها ولا تسمحوا لأحد بعد ذلك أياً كان أن يفرض علينا ما لا نريده أو نقبله .
مصر بلدنا هنحافظ عليها وهنغيرها للأحسن وهنبطل تفاهه ومش هنشغل دماغنا طول الوقت بالكوره والأفلام والمسلسلات التركي واخبار الفنانين . لاء هنهتم بمصر بس وباللي ينفع مصر . هنقرا كتير وهنثقف نفسنا وهنراعي ربنا في كل تصرفاتنا وفي شغلنا وهنشتغل بضمير وبجد وهنكون نافعين ومنتجين وهنقول للفساد لاء وللجهل لاء وهنعطي لكل واحد حقه وهنضرب بالجزمه كل واحد جاهل وفاسد ولازم يعرف قدره ووضعه . وهنشتري علم بلدنا وهنحبه وهنحطه في كل بيت وفي كل بلكونه وان شاء الله حياتنا تبقي افضل واحسن . مفيش احلي من الحريه لما تكون بإيدينا ومفيش أحلي من الإستمتاع بيها ومفيش أحلي من إنك تشوف الدنيا بتتعدل بعد ما كانت معوجه ... هتتعدلي يا مصر يعني هتتعدلي وحياتك لافضل اغير فيكي لحد ما أموت ...
ألف مبروووووووووك يامحمد
ألف مبروك يابن مصر
ألف مبروك علينا كلنا
ان شاء الله الجي أحسن
انا زعلان منك جدا وفوق ماتتخيل
عشان اتصلت بيك كتييييييير وبعت لك رسايل أرضي وبحري وجوي ولا انت هنا ولا معبر
لالالالالالالالالالا متصالحنيش انسى
منتظر تليفون منك ضروري
سلام ياصاحبي