نــااام يـا مــصــري
26 مايو 2010
نام يا مصرى مصر مش عايزة تناديك
ياللى فقر الدنيا أصبح لك شريك
ياللى كان دائك وفائك والكرامة وكبريائك
الحشيش والبانجو ساقك.كبريائك مات خلاص البركة فيك
نام يا مصرى مصر مش عايزة تناديك
ياللى دايما كنت رافع بالسلاح أيدك لفوق
بالبنادق والمدافع خليت العالم يفوق
النهاردة سهل جدا تحكمك حتة حشيش
الشيوخ فوق مالطة تدن والشباب مابيختشيش
رقصة بلدى ورقصة تانجو
مرة خمرة ومرة بانجو
واللى م الدوامة ينجو يعمل حزب ويعاديك
نام يا مصرى مصر مش عايزة تناديك
فصلوا دستور مقاسهم يلبسوه بس الكبار
وأنت تحت نعال مداسهم قلت أه زى الحمار
قلت أه ولا حد همك مين يدوس فوق وش مين
هما يقروا الفاتحة وأنت كل حرف تقول أمين
أنت عارف بس صامت
حتى بطنك لما صامت
كان حزامك فوقها قامط للزراير يشتكيك
نام يا مصرى مصر مش عايزة تناديك
مين بيفهم فى السياسة ؟ لا الأفندى ولا المدام
المهم الماتش إمتى؟ والنتيجة كام لكام ؟
والعشا فين النهاردة وفى المسلسل عملوا إيه
ولعيب الكورة الفلانى ساب ناديه فى الدورى ليه ؟
كله بيهلوس وهايص
وإنت يا إبن المصرى لايص
جوه مسرح العرايس
والخيوط رابطة فى إيديك
نام يا مصرى مصر مش عايزة تناديك
كنت لما تقول معارض ألف واحد كان يخاف
بعت صوتك فى المعارض وأستغطيت باللحاف
قول نعم . حط العلامة . وأوعى تقرا فى يوم كتاب
هما عايزينك نعامة دافنة راسها فى التراب
والطاووس جنبك يخطى
بصمجى . ويقول دا خطى
وإنت لما رضيت توطى
شوف بقى اللى ح يجرا فيك
نام يا مصرى مصر مش عايزة تناديك
ياللى عايش ع الحضارة وكام هرم على معبدين
يا إبنى دول حبة حجارة إنت فين والناس دى فين
إنت جدك يعنى خوفو ولا خالك أخناتون
دا إنت مابتعرفش تعمل حتى سوستة بنطلون
روح ل ( ينى ) إملا الإزازة والحياة أخر لذاذة
دا إنت يا إبنى مالكش عازة زى فرخة ناقصها ديك
نام يا مصرى مصر مش عايزة تناديك
ويقولولك مصر أكتر حد راعى للسلام
وإحنا زى حمار فى كارو عربجيها العم سام
اللى بيفكر يخالفه أو يقوله حتى ليه ؟
تبقى ليلة أمه كحلى والمعونة تضيع يا بيه
إمشى تحت أوامره بس مرة ( شى ) أو مرة ( هس )
وإن طلعلك مرة حس يبدأ التفتيش عليك
نام يا مصرى مصر مش عايزة تناديك
شفت واحد مرة قالى يا إبنى ماتبطل عويل
إنت ناسى نجيب بتاعنا والنوبل وأحمد زويل
قلتله الأول أخدها بقصة ساء فيها لديانته
وعمك أحمد إيه عملك لما جاب للثانية فمتو
والنبى إتخيب بخيبتك ياللى مش عارف نصيبتك
دا إنت من صغرك لشيبتك لقمتك دى خسارة فيك
نام يا مصرى مصر مش عايزة تناديك
والنبى أنا باكتب قصيدتى ودمعة نازلة من عيونى
أصلى مصرى وكل خيبتى إن أهلى علمونى
إنى لو شفت الحقيقة فى مرة وأسكت أبقى شوشو
وإن قدرك لو يجيلك قولى مين عنك يحوشو
ياللى مستغرب لحالى قوللى بالله يا إبن خالى
لما سيد يبقى سالى طب منين الخير يجيك
نام يا مصرى مصر مش عايزة تناديك
2 التعليقات على نــااام يـا مــصــري
-
كلام مين بس يا سيد باشا هو انا اقدر اتطاول علي أي مصري واقوله نام كده عيني عينك لاء وكمان اخلي سيد يبقي سالي دانا كان ينقطع لساني يا ريس .. هههههههه
والله شكلي انا اللي هجيلك علي فكره وتبقي زياره مفاجئه علشان كمان انا بجد نفسي اشوف صلاح ربنا ييسر الامور وان شاء الله تلاقي عندك
طمني عنك دايما يا ريس
في رعايه الله وأمنه
هههههههههههههههههههه
محمد باشا الكلام دا بتاعك؟
يانهارك يانهارك
داانت فظييييييع النهارده يابني والله
عجبني اوي الجزء دا :
"شفت واحد مرة قالى يا إبنى ماتبطل عويل
إنت ناسى نجيب بتاعنا والنوبل وأحمد زويل
قلتله الأول أخدها بقصة ساء فيها لديانته
وعمك أحمد إيه عملك لما جاب للثانية فمتو
والنبى إتخيب بخيبتك ياللى مش عارف نصيبتك
دا إنت من صغرك لشيبتك لقمتك دى خسارة فيك
"
_________
وبعدين تعالى هنا انت ازاي تقول :
"لما سيد يبقى سالى طب منين الخير يجيك"
هههههههههههههههههه
هي وصلت لكده
حصلت يعني
طاااااااااااااايب
لك عندي قصيده هجري وراك بيها قريب ان شاء الله
ههههههههههههه
اتصرف بقى ياعم انت
عاوز اشوفك
اضغط علي شويه عشان اجيلك يااخي
ولا انت مش عاوزني اااااااجي
هه قول قول انا شايفك قول
ابقي كلمني عشان اطمن عليك ياريس
تقبل مروري وتحيتي